ՄԵՐ ՄԱՍԻՆ

«Երևանշին» ընկերությունը հիմնադրվել է 1980թ-ին և հանրապետության շինարարության ոլորտում իր առաջատարի դերն ապահովում է առ այսօր: Բոլորին է հայտնի, որ դարեր շարունակ շինարարությունը հայի ճարտարագիտական մտքի կարևորագույն արտացոլանքն է եղել, վկայությունը` մեր նախնիների մեզ թողած ճարտարապետական հիասքանչ նմուշները: Հայաստան երկրում, սկսած հեթանոսական հնագույն ժամանակներից, շինարարը միշտ էլ եղել է հարգանքի արժանի ու պատվաբեր մասնագիտություն և մենք անընդհատ ձգտել ենք հավատարիմ մնալ հայոց շինարարական ավանդույթներին:

ՎԱԶԳԵՆ ՊՈՂՈՍՅԱՆ /Ընկերության տնօրեն/ Տեխնիկական գիտությունների դոկտոր, Ճարտարագիտական Ակադեմիայի իսկական անդամ

«Երևանշին» ընկերության գործունեության արդյունք են Երևան քաղաքի բնակարանային ֆոնդի շինարարության ավելի քան երեսուն տոկոսը, բազմաթիվ դպրոցական, նախադպրոցական համալիրների, մշակութային օջախների, հասարակական և կենցաղային նշանակության կառույցների շինարարական աշխատանքները, Հայաստանում Ռուսաստանի Դաշնության դեսպանատան շենքը:

Մեծ եղավ մեր ընկերության ներդրումը Սպիտակի երկրաշարժի հետևանքների վերացման և աղետի գոտու վերականգնման աշխատանքներում:
2002-2004թթ Լինսի ծրագրի շրջանակներում «Երևանշին» ընկերությունը կատարել է Երևանի Ալ. Սպենդիարյանի անվան օպերայի և բալետի պետական ակադեմիական թատրոնի, Ա. Խաչատրյանի անվան մեծ համերգասրահի, Կոմիտասի անվան կամերային երաժշտության տան, մայրաքաղաքի Հանրապետության հրապարակի հիմնանորոգման և վերականգնողական համալիր աշխատանքները:
«Երևանշին» ընկերությունն իրականացրել է նաև Երևանի Սուրբ Գրիգոր Լուսավորիչ մայր եկեղեցու կառուցումը, որն իր ճարտարապետական և ծավալահատակագծային (ծավալատարածական) լուծումներով թերևս եզակին է Հանրապետությունում:



Ներկայումս «Հազարամյակի մարտահրավեր հիմնադրամ-Հայաստան» ծրագրի շրջանակներում ֆրանսիական «Ֆարեմքս Թեքնոլոջիս» ընկերության հետ համատեղ իրականացնում ենք Հայաստանի 17 պոմպակայանների վերականգնման-վերանորոգման աշխատանքները, ինչպես նաև երրորդ կարգի ջրանցքների վերականգնման աշխատանքները, որոնք տեղակայված են Հայաստանի գրեթե բոլոր մարզերում:

Մենք ձգտում ենք արդիականացնելով ոլորտը, հայկական հինավուրց ավանդույթները լրացնել ժամանակակից շինարարական եղանակներով, տեխնիկայով, տեխնոլոգիաներով և միշտ էլ խնդիր ենք դրել սերունդներին թողնել այնպիսի արժեքներ, որոնք դարեր հետո ունենան և ներկայացվեն նույնպիսի հպարտությամբ, ինչպես մենք ենք հպարտանում մեր անցյալով:

Ընկերությունն ունի քարի և ավազի հանքեր, բետոնի մետաղական կոնստրուկցիաների պատրաստման, քարի մշակման, հայելու, ապակե փաթեթների, երկաթե, փայտե, ալյումինե և մետաղապլաստ դռների, պատուհանների, տարբեր չափի և ձևի միջնորմային բլոկների, բետոնե ձևավոր սալերի, եզրաքարերի, ջրատարների պատրաստման արտադրամասեր և այլն: Մի խոսքով, ունենք այն ամենն ինչ անհրաժեշտ է մեզ տնտեսության մեջ, ուստի շատ քիչ ենք օգտվում շուկայի առաջարկից:

«Երևանշին» ընկերությունն ունի նաև նորաբաց ուսումնանախագծային կենտրոն, որտեղ իրականացվում են բազմատիպ ու բարձրահարկ կառույցների նախագծային համալիր աշխատանքներ, ուսումնական մասում` բարձրակարգ մասնագետների կողմից դասավանդվում են "Лира 9,6" և "AutoCAD 2010" ծրագրերը, գործում է նաև «Շինարարության ոլորտում աշխատող մասնագետների վերապատրաստման հատուկ կուրս»-ը, իրականացնում ենք տարբեր կարգի շինմոնտաժային, ուժեղացման-վերականգնողական աշխատանքներ, խորհրդատվություն և տեխնիկական վերահսկողություն: